చేవెళ్ల ఫామ్‌హౌస్‌లో అర్ధరాత్రి డ్రగ్స్‌ పార్టీ కలకలం!

నిత్యం నిఘా, బ్యూరో (హైదరాబాద్):

చేవెళ్ల ఫామ్‌హౌస్‌లో అర్ధరాత్రి డ్రగ్స్‌ పార్టీ కలకలం!

108 మంది విద్యార్థులు పోలీసుల అదుపులో.. నలుగురికి గంజాయి పాజిటివ్‌

7 కార్లు, 3 ద్విచక్ర వాహనాలు, 70 సెల్‌ఫోన్లు స్వాధీనం

హైదరాబాద్‌ శివారులోని చేవెళ్ల ప్రాంతంలో అర్ధరాత్రి నిర్వహించిన ఫామ్‌హౌస్‌ పార్టీపై పోలీసులు మెరుపు దాడి చేయడంతో మాదకద్రవ్యాల వ్యవహారం వెలుగులోకి వచ్చింది. ఈ పార్టీలో పాల్గొన్న 108 మంది విద్యార్థులను పోలీసులు అదుపులోకి తీసుకున్నట్లు సమాచారం. పోలీసుల తనిఖీల్లో నలుగురు విద్యార్థులకు నిర్వహించిన పరీక్షల్లో గంజాయి పాజిటివ్‌గా నిర్ధారణ కావడం తీవ్ర కలకలం రేపింది.

ఫామ్‌హౌస్‌లో తనిఖీలు నిర్వహించిన పోలీసులు గంజాయితో పాటు ఏడు కార్లు, మూడు ద్విచక్ర వాహనాలు, 70 సెల్‌ఫోన్లను స్వాధీనం చేసుకున్నట్లు తెలిసింది. ఒకే పార్టీలో ఇంత పెద్ద సంఖ్యలో విద్యార్థులు పట్టుబడటం యువతలో పెరుగుతున్న మాదకద్రవ్యాల వినియోగంపై ఆందోళన కలిగిస్తోంది.

అసలు ఈ పార్టీని ఏర్పాటు చేసింది ఎవరు? విద్యార్థులకు ఆహ్వానాలు ఎలా అందాయి? ఫామ్‌హౌస్‌లోకి గంజాయి ఎలా చేరింది? దీని వెనుక మాదకద్రవ్యాల సరఫరా ముఠాల ప్రమేయం ఉందా? అనే ప్రశ్నలు తలెత్తుతున్నాయి.

విద్యార్థుల భవిష్యత్తును మాదకద్రవ్యాల మత్తులోకి నెట్టే ఇలాంటి వ్యవహారాలపై పోలీసులు సమగ్ర దర్యాప్తు చేపట్టాల్సిన అవసరం ఉంది. పార్టీ నిర్వాహకులు, మాదకద్రవ్యాల సరఫరాదారుల పాత్రను వెలికితీసి బాధ్యులపై చట్టప్రకారం కఠిన చర్యలు తీసుకోవాలని ప్రజలు కోరుతున్నారు.